சாம்சங் 'சால்வ் ஃபார் டுமாரோ' இறுதிச் சுற்றில் தமிழ்நாட்டு மாணவர்கள்: செயற்கை நுண்ணறிவில் அசத்தல்

சென்னை: சாம்சங் நிறுவனம் நடத்தும் 'சால்வ் ஃபார் டுமாரோ 2026' (Solve for Tomorrow 2026) தொழில்நுட்பப் போட்டியின் முதல் 20 இடங்களுக்குள் தமிழ்நாட்டைச் சேர்ந்த 3 மாணவர் குழுக்கள் தேர்வாகி சாதனை படைத்துள்ளன. சென்னை மற்றும் கோவையைச் சேர்ந்த 9 இளம் கண்டுபிடிப்பாளர்கள் அன்றாடப் பிரச்சினைகளுக்கு செயற்கை நுண்ணறிவு மூலம் தீர்வு கண்டுள்ளனர்.

கோவையைச் சேர்ந்த '4 பர்சன்டேஜ்' குழுவின் சஜித், மித்ரன், கவின் நானதா ஆகியோர் 'மைக்ரோலேர்னிங் AI' என்ற தீர்வை உருவாக்கியுள்ளனர். தொழிற்சாலை மற்றும் களப் பணியாளர்களுக்கு சிக்கலான தகவல்களை 2-3 நிமிட வீடியோக்களாக மாற்றி, வாட்ஸ்ஆப் மூலம் தாய்மொழியில் வழங்கும் முறை இது. வேலையை விட்டு விலகாமலே பயிற்சி பெற முடியும் என்பது இதன் சிறப்பு.

'ஜார்விஸ்' (JARVISS) குழுவின் 'சேஃப்பாத் AI' (SafePath AI), ஸ்மார்ட்போன் மூலம் பயணிகளுக்கு முன்கூட்டியே குழிகள் மற்றும் தண்ணீர் தேங்கிய சாலைகள் குறித்து எச்சரிக்கை விடுக்கும் அமைப்பு. சென்னையின் மழைக்கால சாலை அபாயங்களுக்கு இது நேரடித் தீர்வாக அமையும்.

'ரோக்' (Rogue) குழுவின் 'நியூரோஸ்ட்ரைடு' (NeuroStride), பார்கின்சன் நோயால் பாதிக்கப்பட்டவர்கள் சுறுசுறுப்பாகவும் தன்னம்பிக்கையுடனும் இயங்க உதவும் செயற்கை நுண்ணறிவு அணியக்கூடிய சாதனம்.

இறுதிச் சுற்றுக்குத் தேர்வான குழுக்களுக்கு சாம்சங் நிறுவனமும், ஐஐடி தில்லியின் FITT அமைப்பும் வழிகாட்டுதல் வழங்கி, இந்த முன்மாதிரிகளை மேம்படுத்தி தொழில் முனைவுக்கு ஏற்ற தீர்வுகளாக மாற்ற உதவும். தமிழ்நாட்டு மாணவர்களின் இந்த சாதனை, தொழில்நுட்பக் கண்டுபிடிப்பில் மாநிலத்தின் வளர்ந்து வரும் ஆற்றலை வெளிப்படுத்துகிறது.