சென்னை மெட்ரோ ஆன்லைன் டிக்கெட் சேவை முடங்கியதால் பயணிகள் அவதி

சென்னை: சென்னை மெட்ரோ ரயில்களில் இன்று (அக். 3) காலை ஆன்லைன் மூலம் பயணச்சீட்டு பெறும் சேவையில் தொழில்நுட்பக் கோளாறு ஏற்பட்டதால் பயணிகள் கடும் அவதிக்கு ஆளாகினர்.

சென்னை மெட்ரோ ரயில் நிறுவனத்தின் மொபைல் செயலி, க்யூஆர் குறியீடு, வாட்ஸ்ஆப், பேடிஎம், போன்பே உள்ளிட்ட இணையவழி டிக்கெட் சேவைகள் அனைத்தும் முடங்கின. இதையடுத்து, பயணிகள் டிக்கெட் கவுன்டர்களில் டிக்கெட் பெற்றுக்கொள்ளுமாறு மெட்ரோ நிர்வாகம் காலையில் அறிவித்தது. இதனால் நிலையங்களில் நீண்ட வரிசைகள் காணப்பட்டன; அலுவலக நேர நெரிசலில் பயணிகள் தவித்தனர்.

பின்னர், தொழில்நுட்பக் கோளாறு சரிசெய்யப்பட்டு ஆன்லைன் டிக்கெட் சேவை வழக்கம் போல் இயங்குவதாக நிர்வாகம் அறிவித்தது. ஏற்பட்ட சிரமத்திற்கு வருத்தம் தெரிவிப்பதாகவும் கூறப்பட்டது.

டிஜிட்டல் பயணச்சீட்டு முறையை நோக்கி மெட்ரோ நிர்வாகம் பயணிகளைத் தள்ளி வரும் நிலையில், இதுபோன்ற தொழில்நுட்பக் கோளாறுகள் அடிக்கடி நிகழ்வது பயணிகளிடையே அதிருப்தியை ஏற்படுத்தியுள்ளது. 'சிங்கார சென்னை அட்டை' மற்றும் 'சிஎம்ஆர்எல் பயண அட்டைகள்' வைத்திருப்போரும் கவுன்டர்களையே நம்ப வேண்டிய நிலை ஏற்பட்டது.

முக்கிய பொதுப் போக்குவரத்து அமைப்பின் டிஜிட்டல் உள்கட்டமைப்பு இவ்வளவு எளிதில் முடங்குவது, அதன் நம்பகத்தன்மை குறித்த கேள்விகளை எழுப்புகிறது. கோளாறுக்கான காரணம் குறித்து நிர்வாகம் வெளிப்படையாக விளக்க வேண்டும் என பயணிகள் அமைப்புகள் வலியுறுத்துகின்றன.