தெலங்கானா அனந்தகிரி மலைப்பாதையில் பேருந்து கவிழ்ந்து 4 பெண்கள் பலி

ஹைதராபாத்: தெலங்கானா மாநிலம் விகாராபாத் மாவட்டத்தில் அனந்தகிரி மலைப்பாதையில் பேருந்து கவிழ்ந்த விபத்தில் 4 பெண்கள் உயிரிழந்தனர். இறுதிச் சடங்கு ஒன்றில் கலந்துகொள்ளச் சென்று கொண்டிருந்த பேருந்து விபத்துக்குள்ளானது துயரத்தை மேலும் அதிகரித்துள்ளது. பட்டன்சேரு பகுதியைச் சேர்ந்த கேசரம் கிராமத்தில் இருந்து 54 பயணிகளுடன் புறப்பட்ட பேருந்து, அனந்தகிரி மலைப்பாதையில் சென்றுகொண்டிருந்தபோது கட்டுப்பாட்டை இழந்து கவிழ்ந்தது. பிரேக் பழுதே விபத்திற்குக் காரணம் என்று முதற்கட்டமாக சந்தேகிக்கப்படுகிறது. விபத்தில் 4 பெண்கள் சம்பவ இடத்திலேயே உயிரிழந்தனர். பலர் காயமடைந்து மருத்துவமனையில் சிகிச்சை பெற்று வருகின்றனர். தகவலறிந்து சம்பவ இடத்திற்கு விரைந்த போலீஸாரும் மீட்புக் குழுவினரும் மீட்புப் பணிகளில் ஈடுபட்டனர்; காயமடைந்தவர்கள் அருகிலுள்ள மருத்துவமனைகளுக்கு கொண்டு செல்லப்பட்டனர். மலைப்பாதைகளில் இயங்கும் பேருந்துகளின் பராமரிப்பு மற்றும் பாதுகாப்பு குறித்த கேள்விகளை இந்த விபத்து மீண்டும் எழுப்பியுள்ளது. பிரேக் பழுது போன்ற தொழில்நுட்பக் கோளாறுகள் பயணத்திற்கு முன்பே கண்டறியப்பட்டிருக்க வேண்டும் என்று பயணிகளின் உறவினர்கள் குற்றம் சாட்டியுள்ளனர். விபத்து குறித்து போலீஸார் வழக்குப் பதிவு செய்து விசாரித்து வருகின்றனர். இறுதிச் சடங்கில் கலந்துகொள்ளச் சென்றவர்கள், தங்கள் உறவினருக்கு இறுதி அஞ்சலி செலுத்த முடியாமல் தாங்களே பெரும் இழப்பைச் சந்தித்த சோகம் அப்பகுதியில் பெரும் அதிர்ச்சியை ஏற்படுத்தியுள்ளது.