தகாத உறவை தட்டிக்கேட்ட 6 மாத கர்ப்பிணி கொடூரக் கொலை: மாமியார் உட்பட 6 பேர் கைது

புதுக்கோட்டை: 6 மாத கர்ப்பிணிப் பெண் மர்மமான முறையில் உயிரிழந்த வழக்கில், அவர் கொடூரமாகக் கொலை செய்யப்பட்டது அம்பலமாகியுள்ளது. இது தொடர்பாக மாமியார் உட்பட 6 பேரை கணேஷ் நகர் போலீசார் கைது செய்துள்ளனர்.

புதுக்கோட்டை மேட்டுப்பட்டி அருகே இந்திரா நகரைச் சேர்ந்தவர் பாண்டித்துரை. ஈரோட்டில் தனியார் நிறுவனத்தில் பணியாற்றும் இவருக்கும், சந்தியா (21) என்பவருக்கும் ஒரு வருடத்திற்கு முன்பு திருமணம் நடந்தது. 6 மாத கர்ப்பிணியாக இருந்த சந்தியா, கடந்த செப்டம்பர் 30-ம் தேதி சந்தேகத்திற்கிடமான முறையில் உயிரிழந்தார்.

சந்தியா உணவு உட்கொள்ளும்போது மூச்சுத் திணறல் ஏற்பட்டு உயிரிழந்ததாக உறவினர்கள் முதலில் போலீசாரிடம் கூறினர். ஆனால் பிரேதப் பரிசோதனையில் சந்தியா கழுத்தை நெரித்துக் கொலை செய்யப்பட்டது உறுதியானது. மருத்துவர்கள் தகவல் தெரிவித்ததை அடுத்து போலீசார் தீவிர விசாரணை நடத்தினர்.

விசாரணையில் அதிர்ச்சித் தகவல்கள் வெளியாகின. சந்தியா, தனது கணவரின் சகோதரி பாண்டி மீனா மற்றும் உறவினர் கனிமொழி ஆகியோரின் தகாத உறவு குறித்து கணவரிடம் கூறியுள்ளார். இதனால் ஆத்திரமடைந்த உறவினர்கள் சந்தியா மீது முன்விரோதம் வளர்த்து வந்துள்ளனர்.

சம்பவத்தன்று குற்றவாளிகள் வீட்டில் தொலைக்காட்சியின் சத்தத்தை அதிகப்படுத்திவிட்டு, துப்பட்டாவால் சந்தியாவின் கழுத்தை நெரித்தும், தலையணையால் முகத்தை அழுத்தியும் கொடூரமாகக் கொலை செய்துள்ளனர். பின்னர் உடல்நலக்குறைவு எனக் கூறி மருத்துவமனைக்குக் கொண்டு சென்றுள்ளனர். ஆனால் மருத்துவர்கள் அவர் ஏற்கனவே இறந்துவிட்டதை உறுதி செய்தனர்.

இது தொடர்பாக மாமியார் பானுமதி (46), நாத்தனார்கள் பாண்டி மீனா (33), பொற்கொடி (29), மாமனாரின் தங்கை செல்வி (38), அவரது மகன் கார்த்தி (24), கணவரின் அத்தை கனிமொழி (27) ஆகிய 6 பேரையும் போலீசார் கைது செய்து நீதிமன்றத்தில் ஆஜர்படுத்தி சிறையில் அடைத்தனர். சந்தேக மரண வழக்கு கொலை வழக்காக மாற்றப்பட்டுள்ளது.